الحرس الثوري قصف مكتب نتنياهو من شوية، والمقاتلات الحربية الأمريكية بتقع زي الرز، وواضح إن النهارده هيكون يوم مختلف تمامًا، وهيكون أول يوم نشوف فيه انكسار للغطرسة الأمريكية المبالغ فيها!
بص يا صديقي، الموضوع دلوقتي بيوسع مننا خالص، والمنطقة كلها دلوقتي بتغلي لدرجة ان تقرير لصحيفة الواشنطن بوست من شوية نقل عن مصادر داخلية في إدارة ترامب إن "هناك قلق متزايد داخل البنتاجون وبين أعضاء بإدارة ترمب من خروج الصراع مع إيران عن السيطرة!"
⚫️ خليني أديك خلاصة الأحداث لحد دلوقتي عشان هتتفاجيء بضخامة اللي حصل في الكام ساعة اللي فاتوا... 👇
1️⃣ وخلينا نبدأ بسقوط أسطورة الـ F15في رمال الكويت!
من كام ساعة ظهرت فيديوهات عملت ارتجاج في أسواق السلاح الأمريكية، باين فيها مقاتلات أمريكية من طراز F15 وF16 بتقع فوق أراضي الكويت زي الرز... إحنا بنتكلم عن 5 طيارات على الأقل وقعوا في وقت واحد، حسب وسائل الإعلام الإيرانية ومنها شبكة تسنيم!
🔹️ طب ليه وقعوا؟!
لحد دلوقتي مفيش خبر مؤكد، بس الكويت بتقول إن الدفاع الجوي الكويتي استهدفهم بالخطأ... وإيران على الناحية التانية بتقول إن وحدة خاتم المرسلين هي اللي استهدفتهم ووقعتهم...
🔵 وفي تقارير تالتة خالص من بعض وسائل الاستخبارات المفتوحة OSINT، بتقول إن ده شغل ذكاء اصطناعي صيني سمم بيانات الرادارات وخلى الدفاع الجوي يضرب طياراته الحليفة ويتعامل معاها على انها عدو!
🟡 الخلاصة إن أمريكا النهاردة اتمسح بسمعة طياراتها البلاط، والصور اللي طالعة لطيارين أمريكان وهما متثبتين بالعصاية من مواطنين كويتيين بعد ما نزلوا بالبراشوت، دي صور هتفضل محفورة في التاريخ كواحدة من أكبر الإهانات العسكرية لأمريكا من وقت حرب فيتنام!
بس الموضوع موقفش هنا...
2️⃣ حزب الله في وقت الفجر دخل المعركة رسميًا "ثأراً للخامنئي"، وضرب حيفا برشقات صاروخية ومسيرات خلت صافرات الإنذار تدوي في مقرات الأمم المتحدة نفسها... وبعدها مباشرة إسرائيل ردت بهجوم هستيري على بيروت والضاحية والنبطية، وطلبت من سكان 53 قرية في الجنوب والبقاع يخلوا بيوتهم فورًا!
🟢 وبالفعل نفذت عمليات قصف جوي ضخمة، نتج عنها أخبار غير مؤكدة لسه عن اغتيال قيادات تقيلة زي "محمد رعد" نائب أمين عام الحزب، ووزارة الصحة اللبنانية في آخر تحديث من كام ساعة بتقول إن فيه أكتر من 31 شهيد و150 جريح في حصيلة أولية.. ده غير إن نتنياهو استدعى 100 ألف جندي احتياط للجيش... يعني الحرب البرية في لبنان بقت مسألة وقت مش أكتر!
🔸️ طيب إيران سكتت ع الكلام ده؟!
لأ طبعًا...
3️⃣ الحرس الثوري بعدها فتح النار على أمريكا واسرائيل في كل الاتجاهات، وعملوا حاجة تاريخية... ضربوا مقر الحكومة في تل أبيب، ومكتب نتنياهو، ومقر قائد سلاح الجو الإسرائيلي في وقت واحد!
🟣 لحد دلوقتي لسه مش معروف مصير نتنياهو بعد الضربة، لكن وكالة "تسنيم" الإيرانية زي ما هتشوف في المصدر تحت، أكدت الاستهداف وقالوا انهم مش عارفين حصله حاجة بعد الضربة ولا لأ...
ولسه لسه...
🟠 خد عندك صواريخ باليستية كمان ضربت القدس وتل أبيب وأشدود دون اعتراض... عارف يعني أيه؟! يعني القبة الحديدية كانت متعطلة، وفي ناس بتقول انها كانت واقفة لمدة كبيرة، وعشان كده الصواريخ كانت بتعدي بشكل مباشر وبتضرب أهدافها من غير حتى ما تفعل صافرات الإنذار!
السؤال بقى هو ازاي ده حصل؟ هل وسائل الدفاع الجوي الخاصة بالقبة الحديدية اتضربت بهجمة سيبرانية مثلًا؟ الله أعلم، أنا زيي زيك مش عارف الحقيقة لسه!
⚫️ كمان الصواريخ الإيرانية قصفت محيط مفاعل ديمونة في صحراء النقب بصواريخ انشطارية، وفي تقارير عن غصابة مقرات الشاباك في المنطقة...
والقصف موقفش عند إسرائيل...
🔵 الإيرانيين كمان قصفوا مصفاة "رأس تنورة" التابعة لأرامكو في السعودية بمسيرات انتحارية إيرانية من طراز "شاهد" والنار ولعت فيها... وضربوا قاعدة "علي السالم" في الكويت وقاعدة في البحرين، ومواقع كتير في الكويت والعراق والإمارات!
إيران من الآخر بتقول لأمريكا مفيش مكان آمن في الخليج كله!
🟡 وفي كلام عن دخول الفصائل العراقية للحرب واستهدافهم قاعدة أربيل، وتقارير بردو غير رسمية عن ان ايران بتستعمل طيران روسي من نوع سوخوي Su-35.. بس ده (غير رسمي ومش مؤكد)..
4️⃣ وسط اللي بيحصل ده كله، تقارير عن الشرق بلومبرج نقلت إن الحكومة الإسرائيلية ضخت 9 مليار شيكل إضافية (ما يزيد عن 2.1 مليار دولار) لميزانية الدفاع لتمويل الحرب على إيران، وترامب قال في تصريحات لنيويورك تايمز إنه بيتوقع استمرار الهجوم على إيران لمدة 4-5 أسابيع..
5️⃣ والمشكلة بقى إن عقيدة الشهادة عند الإيرانيين والشيعة في العالم كله بدأت تشتعل للثأر من اللي حصل للمرشد، وبالفعل خلال الكام ساعة اللي فاتوا حصلت حادثة من واحد لابس قميص عليه علم إيران ضرب نار على اتنين موتهم وجرح حوالي 14 واحد في ولاية تكساس في أمريكا...
🔸️ وفي محاولات كتير بتحصل لاقتحام السفارات الأمريكية في باكستان والعراق، والدنيا مش تمام معاهم خالص في كل حتة في العالم، لدرجة إنهم حطوا حواجز حوالين مبنى الكونجرس في قلب واشنطن "خوفًا من استهدافه بهجمات إر.ه.ـابـ.ـية!
6️⃣ في وسط اللي بيحصل ده كله، الصين وروسيا بيراقبوا من بعيد ولسه لحد دلوقتي متدخلوش بشكل رسمي، بس كل الدلائل بتشير (في رأيي الشخصي مش مصدر رسمي) لإنهم بيدعموا الإيرانيين في الخفاء، وهدفهم إنهم يحولوا الحرب دي لفخ تغرز فيه أمريكا ويستنزفوا قوتها وذخيرتها، بالضبط زي ما عملت مع روسيا في أوكرانيا...
وبرغم إن ترامب قال انه منفتح على التفاوض مع إيران، إلا إن علي لاريجاني قالك مفيش تفاوض والحرب مش هتتوقف إلا لما احنا نقرر انها تتوقف!
🔴🔴 بس كده... انت كده معاك التحديثات لحد لحظة كتابة هذه السطور، مع حذف بعض التفاصيل الإضافية اللي مش هتأثر أوي... فـ متنساش الشير عشان التفاصيل توصل لغيرك، وخلال الساعات اللي جاية هنتابع مع بعض أيه اللي بيحصل في المنطقة ومجرد ما يحصل جديد هقولك عليه...
#علام