في زلزال ضرب محافظة سمنان الإيرانية امبارح، والزلزال ده قالب الدنيا دلوقتي في الإعلام والسوشيال ميديا... بس ليه؟! ايه الغريب يعني في ان زلزال يضرب إيران؟
⚫️ الغريب يا صديقي هو ان الزلزال ده، واللي قوته كانت 5.1 ريختر حصل في منطقة صحراوية نائية كبيرة جدًا بيسموها "مثلث برمودا الإيراني".. والمفاجأة بقى ان المنطقة دي بتضم واحد من أخطر المواقع النووية السرية في البلاد!
ومش بس كده.. ده أمريكا بعتت طيارات قذف نووي B-2 Spirit جديدة لمنطقة الشرق الأوسط، وبتحشد عدد رهيب من المقاتلات الحربية دلوقتي في قواعدها العسكرية اللي في السعودية.. وكل التوقعات بتقول ان الوضع على وشك الانفجار قريب جدًا...
🔹️ طب يا ترى أيه اللي بيحصل وأيه علاقة كل ده ببعضه، وبالوضع المشتعل دلوقتي في الشرق الأوسط؟!
تعالى معايا بقى أحكيلك اللي حصل خلال ال 24 ساعة اللي فاتوا، ونشوف مع بعض تطورات الموقف وصلت لفين.. وخلينا ناخد التفاصيل واحدة واحدة بالتسلسل كإنها قصة، عشان تبقى فاهم كل حاجة جت منين ورايحة على فين... 👇
🔴 شوف يا سيدي.. في خلال الساعات اللي فاتت، وبعد ضرية إيران الأخيرة على عمق تل أبيب وبئر السبع، وتدميرهم المنشآت الحكومية اللي حكيتلك عنها في البوست اللي فات.. اسرائيل اتجننت... وبعدها بشوية، بدأت بسلسلة غارات جوية انتقامية مركزة على العمق الإيراني...
الضربات دي بقى استهدفت مدن زى أصفهان - شيراز - قم - سمنان... وخلّفت وراها دمار هائل... حسب التقارير الإخبارية، ففي حوالي 15 طيارة اسرائيلية دمرت نفق ضخم في غرب إيران كان بيخزن صواريخ، وفي 50 طيارة تانية ضربت أصفهان واستهدفت مباني المدنيين ومواقع دفاع جوي ومنشآت نووية تحت الأرض...
🟢 وبرغم ان الانترنت قاطع دلوقتي في إيران ومفيش أي أخبار واصلانا منها الا بصعوبة، إلا ان طبقًا لوسائل الإعلام الموجودة على الأرض هناك زي وكالة Associated Press وReuters، ف إيران فقدت في الضربات دي حوالي 44 منصة صواريخ، ولحد دلوقتي سقط منذ بداية الحرب أكتر من 639 شهيد مدني، منهم عالم نووي ايراني معروف اسمه إيثار طبطبائي، اغتالته إسرائيل هو وزوجته بطيارة مسيرة أثناء الغارات، حسب وكالة مهر الإيرانية...
🔵 طب هل إيران سكتت؟!
لأ خالص... برغم ان التقارير الإسرائيلية اللي بتنقل عن جيش الاحتلال بتقول ان ايران المفروض كده انها فقدت حوالي 50% من منصات إطلاق الصواريخ بتاعتها، إلا انها ردت على الاعتداء بقوة، وأطلقت رشقة صاروخية جديدة اخترقت السماء الإسرائيلية، ونزلت على تل أبيب وهولون ومناطق تانية في قلب العاصمة...
🟣 كاميرات الإعلام نقلت بعدها صور وفيديوهات للانفجارات والنار اللي اشتعلت في مباني سكنية ومنشآت في الأراضي المحتلة، وحجم دمار اللي حصل كان كبير بردو زي ما بقى معتاد في الضربات الإيرانية اليومين الأخرانيين.. وكل ده بسبب استنزاف ذخيرة الدفاع الجوي للكيان اللي قلل فاعلية القبة الحديدية دلوقتي لما بين 55-60% فقط لأول مرة في تاريخهم!
وطبعًا بسبب ده، فالمدن المحتلة دلوقتي بقت مستباحة عادي للقصف الإيراني، والمستوطنين بقوا مش عارفين يهربوا فين، وعلطول عايشين حياتهم في الملاجيء مبيخرجوش منها...
🔴 طيب... في وسط الضرب المتبادل ده كله بقى، أمريكا بتعمل أيه؟!
🟡🟢 خد الكام معلومة المخيفة دي بقى... 👇
1️⃣ حسب تقارير اخبارية من شبكة Fox News وموقع The Aviationist المختص بأخبار الطيران، بالإضافة لصور تم التقاطها بالأقمار الصناعية بتاريخ امبارح وقبل امبارح، ف أمريكا دلوقتي بتجهز أكبر حشد عسكري في الشرق الأوسط والخليج من ساعة حرب العراق سنة 2003!
🟢 تعزيزات ضخمة عبارة عن: (53 مقاتلة من نوع F-16 – 22 طيارة تزود بالوقود من نوع KC-135 – وحوالي 10 طيارات نقل C-130)، هبطوا دلوقتي في قاعدة الأمير سلطان في المملكة العربية السعودية..
2️⃣ كمان بالإضافة لده، ففي 6 قاذفات نووية من نوع B-2 Spirit الأكثر تطورًا على كوكب الأرض، في طريقهم دلوقتي لقاعدة دييجو جارسيا في المحيط الهندي، غير ال 2 اللي موجودين هناك دلوقتي بالفعل..
🟡 يعني كده خلال ساعات من دلوقتي، هيكون في 8 مقاتلات من النوع ده هناك، ودي أول مرة تحصل في التاريخ ان العدد ده من ال B-2 يكون موجود بره أمريكا أو في الشرق الأوسط!
3️⃣ كل ده بالإضافة لإن القنابل الخارقة للتحصينات من نوع (GBU-57)، اللي المفروض مفيش غيرها يقدر يقصف منشأة فوردو النووية في إيران؛ في تقارير بتقول انها وصلت بالفعل للشرق الأوسط!
🔴 طب وكل ده ليه أصلًا؟!
🟢🟣 عشان المفاجأة الأكبر اللي جاية دي.. خد التقيل بقى.. 👇
🔵 امبارح حوالي الساعة 9 بالليل كده، وفي قلب محافظة سمنان الإيرانية، حصل زلزال غريب بدون أي مقدمات، قوته وصلت حوالي 5.1 على مقياس ريختر...
المنطقة دي يا صديقي أصلًا، وبحسب تقرير لفوكس نيوز هسيبهولك مع المصادر، موجود جواها منشأة نووية إيرانية سرية، بتنتج مادة مشعة اسمها "التريتيوم Tritium".. المادة دي استخدامها الأساسي بيكون المفروض لتعزيز قدرة القنابل النووية، ومالهاش استخدامات سلمية...
🟣 والأغرب بقى من كل ده هو ان الزلزال حصل في مكان اصلا بعيد عن المناطق المعتادة للزلازل الإيرانية.. وبعيد جدًا عن أي منشآت مدنية أو مناطق عمرانية، وفي قلب الصحراء النائية، في مكان مناسب جدًا للاختبارات النووية السرية اللي عادةً بتعملها الدول قبل ما تعلن عن امتلاكها للقنابل النووية!
🟠 طب يعني ايه؟! هل إيران كده ممكن تكون وصلت لقنبلة نووية؟!
هي دي بقى الفكرة يا صديقي.. محدش عارف، ومحدش أعلن عن أي حاجة رسميًا...
🔹️1️⃣ في خبراء بيقولوا ان الزلزال ده طبيعي ومالوش علاقة بالزلازل أو الهزات المصاحبة عادة للإنفجارات النووية، لإنه بصمته السايزمولوجية مطابقة للزلازل الطبيعية.. وفي خبراء تانيين على الناخية المقابلة، بيستشهدوا بحاجة حصلت سنة 2016...
🔹️2️⃣ في سنة 2016، كوريا الشمالية كانت بتعمل تجربة نووية تفجيرية تحت الأرض، والتجربة دي نتج عنها تسجيل هزة أرضية ضخمة قوتها وصلت حوالي 6 ريختر... والخبراء النوويين بقى بيقولوا ان التأثير اللي حصل في إيران امبارح مشابه للي حصل في كوريا وقتها.. وممكن جدًا يكون جزء من ضمن تجارب نووية بتعملها إيران دلوقتي، في سباقها ضد الزمن لامتلاك السلاح النووي، وردع إسرائيل وترامب قبل ما يتخذ القرار بقصف منشأة "فوردو" ويدمرها للأبد...
🔴 الفكرة بقى ان لحد دلوقتي الكونجرس الأمريكي لسه مش موافق على دخول أي حرب... وترامب لغة تصريحاته متضاربة ومحدش فاهم ايه اللي في دماغه.. شوية يقول انه مش هيتدخل، وشوية يقول هتدخل.. شوية يقول هندي ايران مهلة أسبوعين، وفي نفس الوقت بيعمل أكبر حشد عسكري في تاريخ المنطقة الحديث...
🔘 حتى بيل كلينتون نفسه، رئيس أمريكا السابق رقم 42، قال من شوية في تصريح ان نتنياهو بيعمل الحروب دي كلها عشان يفضل في السلطة ويهرب من المحاكمة... وانه هيجر رجل المنطقة كلها لكارثة عالمية لو متمش إيقافه.. وانتقد تصرفات ترامب اللي بتدعمه علنًا، وقال إن الوضع ده لازم يتغير...
🔴 وفي نفس الوقت، الصين وروسيا واضح جدًا انهم بيدعموا ايران بشكل غير مباشر وغير معلن، وده جزء كبير من سبب صمودها لحد دلوقتي قدام العدوان الاسرائيلي..
خصوصًا وان في تقرير لفوكس نيوز هسيبهولك بردو في الكومنتات 👇 بيقول انه تم رصد طائرات شحن من نوع بوينج 747 رايحة من الصين إلى إيران اكتر من مرة... وان الرحلات اللي بتعملها الصين لإيران دي بتستعمل خدع ملاحية بتبين انها رايحة لأوروبا لمدينة لوكسمبورغ، بس مبتدخلش أوروبا أصلًا!
⚫️ كمان بوتين نفسه صرح انه أرسل لإيران معدات وشحنات عسكرية بالفعل، بس قال ان مالهاش علاقة بالحرب وكان متفق عليها من قبل...
🟢🔴 وبكده بقى، فالموقف زي ما انت شايف أصبح معقد وضخم جدًا، وحرفيًا High Stakes Game زي ما بيقول التعبير الأمريكي...
كل الأطراف واقفة في قلب رقعة شطرنج، وكل واحد على بعض خطوة واحدة بس من ال "كش ملك" أو Check Mate.. وكل طرف في وراه كذا حد بيدعمه..
🔹️ أمريكا اللي بتسيطر على الشرق الأوسط من خلال اسرائيل، عايزة تنقذ ابنتها المدللة وتتأكد انها هتفضل القوة الأكبر المهيمنة في الشرق الأوسط..
🔹️ والصين على العكس بتدعم إيران عشان تخلي أمريكا مشتتة، وتقدر هي تجهز غزوها لجزيرة تايوان في 2027 زي ما اتكلمنا في مقال سابق...
🔹️ وروسيا على الناحية التالتة بتدعم إيران عشان تحط أمريكا تحت نفس الضغط اللي هي حطتها فيه بدعمها لأوكرانيا، وتقدر تشتت انفاقها ومجهودها الحربي عشان تحسم هي الحرب الأوكرانية...
🟡🔵 ف يا ترى الساعات الجاية مخبية أيه؟!
الله أعلم.. بس مع كل دقيقة بتعدي، المنطقة كلها بتقرب من اشتعال فتيل محدش هيقدر يوقفه...
🔴 ولو وصلت لهنا متنساش تعمل شير عشان غيرك يعرف التطورات وحقيقة الوضع وصلت لفين...
شكرًا.