أوضح طبيب أطفال بمحافظة سوهاج عبر صفحته الشخصية فيس بوك أسباب انتشار الفيروسات وانواعها خلال هذه الفترة وقال :
• متحور الإنفلونزا اللي معاه سخونية شديدة واحتقان بالحلق ورشح، ويسبب مضاعفات التهاب بالعضلات وصعوبة بالمشي.
⚠️ بلاش نعمل تحاليل زي سرعة ترسيب والميكروب السبحي؛ دي انفلونزا عاملة التهاب بالعضلات مش حاجة تانية.
• وكمان بيعمل التهاب بالأذن الوسطى، وأحيانًا التهاب رئوي، وكتير جدًا يعمل التهاب بالجيوب الأنفية.
وبرضو في متحور كورونا، ودا بيسبب:
– سخونية شديدة
– فقدان شهية
– ضعف عام
وله نفس المضاعفات بتاعة الانفلونزا خصوصا الالتهاب الرئوي.
حتى فيروس الهربس منتشر!
وأول مرة أشوف عدد حالات حزام ناري في الأطفال، ودا شيء قليل شوية في الحدوث.
🔺 المشكلة في الاختلاط بالمرضى بالحضانات والبيوت والمدارس.
✨ الفكرة بس في العلاج هو تقديم الرعاية والعلاج المساعد:
• راحة تامة وتغذية سليمة تعتمد على السوائل
• خافض الحرارة بالفم أو الوريد
• المحاليل لو الطفل مش بياكل كويس
• ممكن أدوية المناعة والكحة
• حتى المسكنات علشان تقليل الألم
🔍 ونترقب المضاعفات لعلاجها بشدة منعًا للأثر الطويل المدى على الطفل؛ يعني تكرار زيارة الطبيب مطلوب جدًا.
❗ الفكرة مش في تغيير الأطباء وكثرة الكشوفات…
الفكرة في ملاحقة الأعراض الجديدة وتخفيفها، والقضاء على المضاعفات، ورعاية الطفل بحسب ما يستجد عليه من تعب.
❤️ علشان كده أنا ديما معاكم بالعيادة والواتساب بعد الكشف للمتابعة المستمرة، ثم الإعادة كذا مرة للوصول لشط النجاة.
وربنا يشفي الجميع.