ج/ أيوة فيها مشكلة كبيرة وهي ..
إنك هتلاقي صعوبة كبيرة في إقناع بنتك في التحول من اللبس العادي للحجاب خاصة في فترة البلوغ اللي بيزيد فيها اهتمام البنت بشكلها
هتلاقي منها نفور وكره لانها اتعودت على استايل من اللبس مش عارفه تغيره
وخدوا بالكم من حاجة مهمة
العبادات في أصلها هي تكاليف فيها مشقة وتقيلة على النفوس وبتحتاج تدريب وتعويد وفيه فرق كبييير بين الفرض والمستحب فالفرض ده اللي احنا ملزمين بيه ولو ماعملنهوش بنغضب ربنا، انما المستحبات دي حاجات بتزود في حسناتنا ومش هنتعاقب لو معملنهاش، والحجاب فرض مش مستحب.
فمحتاجين نعود البنت عليه قبل البلوغ بسنتين تلاته ...زي ماالنبي أمرنا نبدأ نعودهم على الصلاة اللي هي فرض زي الحجاب من قبل البلوغ بفترة طويلة ...كمان الحجاب لازم يتدربوا ويتعودوا عشان لما نوصل للحظة الصفر اللي هي البلوغ ويبقى فرض يكون سهل على البنت تقبله
انتوا بقى كأم وأب ...
- خلوا من اول ٨ سنين مثلا للبنت طرحة خاصة بيها بالصلاة
- خلوها تنزل بالطرحة دي بعض المشاوير البسيطة
- خلوها مثلا تروح بيها صلاة العيد
- فهموها إن الحجاب ده تاج وتكريم للمرأة وخلوها تحبه من بدري وأول ماتطلب تلبسه ماتأجلوش وتقولوا لسه صغيرة ، سن البلوغ في البنات بقى بدري على فكرة فيدوب البنت تتعود على الحجاب قبل مايجي البلوغ وتتعبوا في اقناعها