“الحقيقة الكاملة في قصة عبدالله رشدي ومراته… و هوس التريند ‼️
بصراحة اللي حصل في قصة عبدالله رشدي خلاّني أتأكد إننا في زمن العجايب … الناس بقت بتدور على الهيصة مش على الحقيقة ! أنا هقولكم الحقيقة في كلمتين لله ، وبغض النظر عن كوني محامي فضيلة الشيخ عبدالله رشدي وأننا أصدقاء
📌 في الأول قالوا: ان الدكتور عبدالله رشدي مش معترف بمراته و بينكر جوازه منها !
و بعدين رجعت مراته بنفسها وقالت: “معترف بيا رسمي.. بس الراجل مش حابب يعلن على الملأ تفاصيل حياته الخاصة ، وده من حقه.”
🔷 لما الخطة دي فشلت بدأت الناس تدور على حاجة تانية وقالوا: بينكر بنته ومش معترف بيها !
فرجعت مراته بنفسها و قالت: “ده كان معايا وأنا بولد، وكان بيحضر معايا المتابعة عند الدكتور و هو اللي سجل البنت بنفسه و طلع لها شهادة الميلاد .”
قالوا خلاص، نجيبها من باب تاني: مش عايز يصرف علي بنته و يدفع النفقة ،، فخرجت مراته و أكدت على أنه بيصرف و بيبعت نفقة بنته واللي تكفيها كل شهر
فرجعت الناس تدور على باب جديد تهاجم بيه الشيخ ، فقالوا أنه مش عايز يديها حقوقها القانونية ،، فطلعت مراته بنفسها وقالت مع #ياسمين_الخطيب “هو اللي جهّز كل حاجة ومتفقين من الاول علي أنه مفيش قايمة أصلاً، وإننا هنعيش في بيت أهله بس أنا برضه عايزة حقي.”
🛑 لما مراته قالت انهم اتفقوا على شرط يتكتب في قسيمة الجواز بأنه دفع مهر ٥٠ الف جنية و ٥١ جرام دهب و أنها في حالة الخلع لازم ترد المهر و الدهب الناس انقسمت ،، ناس بتقول أن الشرط في القسيمة حرام وأنه لايجوز الزواج المعلق على شرط و ناس بتقول أن ده تقيد ليها في حقها لطلب الخلع ، مع أن مراته نفسها طلعت و قالت إنهم متفقين على الشروط من الاول برضاها و بموافقة أهلها ، و الفكرة كان أساسها أن يبعد عنها اي تفكير في الانفصال.
🔷📌 يعني كل مرة الحقيقة بتفضح الكذب، والناس بدل ما تهدى… بتولّع أكتر!
وهنا بقى المشهد الأعجب:
نص اللي كانوا بيهاجموا #عبدالله_رشدي ،فجأة قلبوا يهاجموا مراته، #امنية_حجازي والنص التاني مكمل في التريند كأنهم في سباق مين يصرّخ أكتر ، وكأن الموضوع مش خلاف زوجين، ده حرب عالمية تالتة بين الرجالة والستات!
اللي حصل ده مش حكاية عبدالله رشدي بس و مراته …ده مراية لمجتمع بيفكّر بالعاطفة مش بالعقل، وبيعيش على التريند مش على المنطق.
👈 الجنون مش في القصة نفسها… الجنون في طريقة تفكير الناس ! وحبهم في الفضايح
💬 هو إحنا فعلاً بقينا في مجتمع بيحب الفضيحة أكتر من الحقيقة ؟
ولا ده زمن أي حد عنده تليفون بقى قاضي بينصب للناس محكمة و يدخل يكتب تعليق و هو شايف ان تعليقه ده هو القرار و الحكم النهائي الصحيح في القضية ‼️
#المحامي_أحمد_مهران
#عبدالله_رشدي ، #امنية_حجازي