🔴 بحمد الله وفضله، الهدنة بدأت رسميًا خلاص من دقائق... بس يا ترى ايه تفاصيل البنود الموقع عليها في الاتفاق، وايه اللي هيحصل خلال الساعات الجاية؟
🔸️ تعالى اشرحلك باختصار عشان تبقى فاهم كل حاجة بأكبر قدر ممكن من التبسيط. 👇
1️⃣🔴 أول حاجة النهارده حصلت خلاص وهي دخول الهدنة حيز التنفيذ بدايةً من الساعة 12 الضهر.. وبعدين الساعة 4 العصر المفروض حكومة الاحتلال تصادق على الاتفاق في الكنيست، وبعدين يعلنوا خريطة الانسحاب لحدود المرحلة الأولى، وينزلوا قوائم بأسماء الأسرى اللي هيتم الإفراج عنهم... وبعدين بالليل يبدأ الانسحاب الميداني لحدود المنطقة اللي حددها ترامب في الخطة.
2️⃣ هيفضل الانسحاب مستمر خلال بكره الجمعة، والسبت كمان، ويوم السبت هتبدأ المقاومة الفلسطينية في اعداد الأسرى الإسرائيليين الأحياء ومعهم جثامين الأسرى القتلى لتسليمهم للاحتلال..
3️⃣ المفروض حسب كلام ترامب انه ييجي مصر يوم الأحد عشان يوقع الاتفاقية ويعلن بنفسه إنهاء الحرب، وغالبا كمان هيروح اسرائيل ويلقي خطبة في الكنيست... وبعدها مباشرة وبدايةً من يوم الاتنين هيبدأ بقى تسليم الأسرى من الطرفين تحت اشراف مصر وقطر وتركيا، وتنسحب اسرائيل من المعابر وتبدأ بالسماح بدخول 400 شاحنة مساعدات يوميًا، والرقم هيرتفع بعدها... وبكده يبقى رسميًا خلاص انتهت 90% من أسباب الحرب...
🟢4️⃣ بعدها بقى نبدأ ندخل في مفاوضات المرحلة التانية المحورية، اللي هي هتكون فيها لحظات مصيرية تتعلق بمستقبل المقاومة ووجود (حم.ا.س) في القطاع...
ازاي؟!
🔵 وفقًا لتقرير من CNBC، ف اتفاق ترامب لمستقبل قطاع غزة مكون من 20 بند بيشمل جواه وفي صورته الأولية خطط لإعادة الإعمار وإطلاق سراح الرهائن نزع السلاح من حم.ا.س..
لكن وفقًا لرويترز، ف المقاومة رفضت بند التخلي عن السلاح برغم ضغوط من بعض دول الخليج. ومصر بالفعل دعمت موقفهم، وتم تجميد البند ده من الاتفاقية ومش هيسلموا سلاحهم دلوقتي، بشرط ان يتم تسليم السلاح فيما بعد للسلطة الفلسطينية اللي هتكون مسئولة عن إدارة شئون القطاع..
🔹️ طيب المفروض مين اللي هيدير القطاع؟!
🟡 حسب خطة ترامب بردو ف المفروض يكون في حاجة اسمها (مجلس السلام)، تتكون من مشرفين من دول عربية، ويرأسها ترامب بشكل شرفي، والإدارة الفعلية تكون لرئيس الوزراء البريطاني الأسبق (توني بلير)..
لكن بردو المقاومة رافضة الكلام ده تمامًا، وبتقول انها لن تتخلى عن حكم غزة إلا لحكومة تكنوقراط فلسطينية تشرف عليها السلطة الفلسطينية وتدعمها الدول العربية والإسلامية.. وبردو مصر بتدعم الموقف ده جدًا، وهو ده اللي بيتم التفاوض عليه حاليًا وبنسبة 99% هو اللي هيحصل...
⚫️ طب يعني ايه الخلاصة؟!
الخلاصة يا صديقي ان اللي بيتنفذ دلوقتي هو الرؤية المصرية لاتفاق وقف الحرب، اللي فيها حكم القطاع يبقى بحكومة مستقلة أو تكنوقراط من الفلسطينيين والعرب، ويكون فيها تمهيد لبدء إقامة دولة فلسطينية مستقلة... لكن طبعًا حكومة الاحتلال مش عاجبها الكلام ده، وعشان كده المرحلة التانية هتكون مرحلة حرجة، لإنها تتعلق بمستقبل نتنياهو السياسي كله...
🟠 دلوقتي هو باين قدام شعبه بصورة المهزوم، لإنه مقدرش يقضي على المقاومة ولا قدر يرجع الأسرى إلا بالمفاوضات، ومقدرش ينفذ خطة التهجير لمصر برغم كل تصريحاته وعربدته والدمار اللي أحدثه في صورة اسرائيل أمام العالم... وعشان كده لازم هيحاول يعمل أي حاجة تانية يضمن بيها استمرار الحرب في مكان تاني عشان يفضل مستمر في الحكم... لإنه لو سقط هيتحاكم وغالبًا مش هيشوف النور تاني..
🟣 وغالبًا اللي هيعمله هيكون متعلق بحرب جديدة هيبدأها مع إيران، وده اللي معظم الدلائل والقراءات العسكرية بتشير لاحتمال حدوثه قريبًا.. ف ربنا يسترها بإذن الله..
🔸️ لكن في النهاية مبروك لاخواتنا الفلسطينيين انتهاء الحرب أخيرًا، وربنا يفك عنهم ويخفف أحزانهم وكربهم، وينصرهم على أعداءهم... شرفتونا بصمودكم وتضحيتكم بكل غالي ونفيس، وانتم شرف الأمة العربية كلها، ربنا يحفظكم ويجعلها آخر المآسي والأحزان، وتكون دي بداية لحل عادل لقضيتكم الأنبل على وجه الأرض.
🔴 المصادر والتفاصيل هسيبهالك في أول كومنت كالعادة 👇 ومتنساش الشير عشان التفاصيل توصل للكل.
شكرًا.