لو انت مش عارف... امبارح قبل الفجر بدقائق، اليابان والصين كانوا على بعد خطوة واحدة بس من اشتباك ومعركة جوية...
حادثة واحدة بس لو كانت حصلت، كانت ممكن تبقى شرارة حرب تغيّر شكل شرق أسيا كلها...
⚫️ اللي حصل بالضبط هو إن في قلب الضلمة فوق منطقة أوكيناوا اليابانية، طيار ياباني معدى على متن طيارته الـ F-16، فجأة سمع صوت الإنذار بينطلق من جوه المقصورة بتاعته... وبمجرد نظرة سريعة على اللي بيحصل على الكمبيوتر قدامه، قلبه اتقبض...
من بعيد، ظهر قدامه مقاتلة صينية من نوع J-15 بتقرب عليه ومستهدفاه بنظام الـ Lock on الخاص برادار التحكّم بإطلاق النار... وده اللي خلى صوت الإنذار يضرب عنده في المقصورة، بعد ما وسائل الدفاع في الطيارة رصدت الاستهداف ده...
🟢 وعشان تبقى فاهم بس، فالإنذار ده مش لعب عيال ولا مجرد تحذير بسيط... ده غالبًا بيكون آخر خطوة قبل ما الطيار العدو يضغط على الزناد ويضرب ناحيته الصاروخ، وتبدأ معركة جوية محدش يقدر يتنبأ بنهايتها...
🔹️ والمشكلة الأكبر ان الحركة دي محصلتش مرة واحدة... دي حصلت مرتين ورا بعض! يعني مستحيل تكون غلطة أو صدفة...
بعد اللي حصل ده، وزارة الدفاع اليابانية طلعت بيان وصفت فيه اللي حصل ده بإنه خطير للغاية، وقدمت شكوى رسمية بإنه "تجاوز للحدود والخطوط الحمراء من الصين"، وانه مش هيعدي بالساهل...
🟡 بس الصين من ناحيتها نفت القصة كلها وقالتلك الكلام ده محصلش، دي اليابان هي اللي أصلًا بتستفزنا، وكمان هي اللي بعتت من كام ساعة طيران حربي فوق حاملة الطائرات الصينية بتاعتنا "لياونينغ"، أثناء تدريب كانت البحرية الصينية بتعمله في بحر الصين...
🔸️ بس بعيدًا بقى عن مين اللي غلط، اللافت في الموضوع مكانش مجرد القصة دي، ولا تبادل الاتهامات والتصعيد... اللافت هو إن أمريكا كانت غايبة تمامًا عن الساحة!
مفيش بيان طلع من الخارجية الأمريكية، ولا البيت الأبيض ولا حتى البنتاغون... صمت تام وغريب من أكبر حليف لليابان، في وسط تصعيد عسكري كبير كان ممكن يقوم حرب كبيرة، على بعد كيلومترات من أكبر قاعدة عسكرية أمريكية في آسيا...
🔵 طب هي ليه أمريكا ساكتة؟!
الإجابة على السؤال ده بقى مهمة جدًا... وعشان تفهمها وتعرف هي أيه، لازم الأول تركز في اللي حصل قبلها بكام ساعة، في وسط فعاليات منتدى ريغان الدفاعي السنوي المُقام في قاعدة كوانتيكو البحرية في فرجينيا...
🔹️ أيه اللي حصل؟!
وزير الدفاع الأمريكي بيت هيغسيث، اللي هو دلوقتي بقى اسمه وزير الحرب، كان بيلقي كلمة في المؤتمر... وفي وسط كلامه ده قال حاجة كانت بمثابة دليل وتوضيح للعالم كله، بيبينلك سياسات أمريكا اللي جاية في المستقبل أيه...
🟣 اللي قاله هيغسيث هو إن زمن "المثالية أو اليوتوبيا Utopia" الأمريكية انتهى خلاص، وان اللي جاي هو "زمن الواقعية الصلبة والمدروسة فقط"... وخلاص انتهى زمن بناء الديمقراطيات والدخول في حروب بعيدة، وأمريكا مش هتركز بعد كده إلا مع نفسها ومصالحها هي وبس...
طب يعني أيه الكلام ده؟!
🟠 يعني باختصار، كل واحد يشيل شيلته ويحل مشاكله بنفسه... أمريكا خلاص مش عايزة، ومش قادرة أصلًا في وسط التهديدات اللي هي فيها وسقف الدين التاريخي اللي وصلتله، انها تشيل شيلة حد ولا تدافع عن حد تاني، وتستنزف نفسها وقدراتها...
خصوصًا كمان في وسط ما هما شايفين ان العالم بيتحول غصب عنهم لنظام متعدد الأقطاب، وكل قوة عظمى بقت خلاص فارضة سيطرتها على محيطها بشكل شبه كامل... الصين بتتمدد في شرق أسيا ومحدش عارف يوقفها، وروسيا بتهين كرامة أوروبا ومحدش عارف يفتح بقه معاهم...
🔴 فبالتالي خلاص هينسحبوا هما من دور الشرطي العالمي اللي كانوا بيلعبوه طول عمرهم، ويرجعوا تاني لعقلية مناطق النفوذ، عشان يركزوا على حديقتهم الخلفية أكتر... والتحركات دي بدايتها هي اللي بالفعل بيعملوه في فنزويلا دلوقتي، والغزو المحتمل اللي بيحضروه لاسقاط نظام نيكولاس مادورو...
يعني خلاص الرسالة للكل واضحة... حلّوا مشاكلكم لوحدكم، احنا خلاص مش هنشيل شيلة حد تاني...
🔸️ وهو ده بالضبط اللي اليابان وأوروبا بيعملوه دلوقتي...
1️⃣ اليابان بالفعل بدأت ترجع تاني تبني جيشها وتتسلح بشكل كبير جدًا عشان ترجع قوة عسكرية كبرى، وتقدر تقف قدام التمدد الصيني بنفسها، وبمساعدة من استراليا وباقي دول بحر الصين...
2️⃣ وأوروبا هي كمان بتتسلح دلوقتي بشكل رهيب عشان تقدر قدام التمدد الروسي اللي خلاص بقى واضح جدًا إنه مش هيقف عند أوكرانيا... وعايز أقولك ان ألمانيا لوحدها راصدة ميزانية بأكتر من نص تريليون دولار دلوقتي، عشان ترجع تبني قوة عسكرية عظمى محصلتش من أيام الحرب العالمية التانية...
🟢 وبالفعل وحسب تقرير لصحيفة The Atlantic، مصانع القطارات الألمانية دلوقتي بتتحول لمصانع عسكرية ثقيلة بتنتج آليات عسكرية ثقيلة زي دبابات "ليوبارد 2" ومدرّعات "بوما" و"بوكسر"، وجزء كبير من خطوط الإنتاج الصناعي بدأ يتم إعادة توجيهها لإنتاج السلاح...
🟡 ومش بس كده، ده الألمان بعد ما كانوا هما اللي بيحموا اسرائيل وبيزودوها بالسلاح، هما نفسهم اللي راحوا لتل أبيب واشتروا منها منظومة الدفاع الصاروخي Arrow 3 من قريب، في أكبر صفقة في تاريخ الصناعات الدفاعية الإسرائيلية، عشان يحموا أجواءهم ضد الطيران والمسيرات الروسية...
🟠 وحتى شركات التكنولوجيا الناشئة في ألمانيا دلوقتي بدأت تتوجه لصناعة المسيرات الانتحارية وتطويرها بأعداد مهولة، تمهيدًا لإعادة بناء الجيش الألماني وتطوير قدراته عشان يكون أكبر وأقوى جيش في أوروبا كلها... بالضبط زي اللي كان بيحصل قبل الحرب العالمية... أقطاب ومراكز قوى بتتشكل، وصدامات عمالة تحصل في عالم خلاص أصبح متعدد الأقطاب رغما عن الجميع...
وهنا بقى ييجي السؤال...
⚫️ هل اليابان جاهزة فعلًا تواجه الصين لوحدها؟ وهل أوروبا هتقدر تلحق تبني جيوشها قبل ما الروس يفرضوا نفوذهم على القارة كلها؟ ولا احنا على وشك إننا نشوف أكبر تغيير في معادلات القوى من ساعة الحرب الباردة؟
🔴 الله أعلم... وأدينا متابعين اللي بيدور في العالم، وهنتكلم عنه بشكل دوري... وفي النهاية هسيبلك كامل التقارير والمصادر اللي اعتمدت عليها تحت في الكومنتات، ومتنساش لو وصلت لهنا انك تعمل شير للبوست عشان يوصل لغيرك ويعرف تفاصيل اللي بيدور في العالم...
شكرًا.