قالوا لابوهم لو نزلت مصر هنحبسك ،، حكاية "دكتور الشرقية" اللي ولاده " اختلسوا ٥٠ مليون جنيه " عليه بعد شقا 30 سنة غربة!
هي الدنيا جرى فيها إيه؟
الناس مابقتش بتطمر فيها اللقمة ليه؟
أسئلة كتير بتدور في بالنا لما نسمع حكاية توجع القلب زي اللي حصلت مع الدكتور "محمد عبدالغني قاسم"، ابن محافظة الشرقية، اللي قضى أحلى سنين عمره في الغربة عشان خاطر "لحمه ودمه"، وفي الآخر كانت المكافأة "طرد وتهديد بالسجن"!
30 سنة شقا ضاعوا في الهوا
الحكاية بتبدأ بدكتور مصري سافر واتغرب أكتر من 30 سنة، كان بيحرم نفسه من لقمة الهنية عشان يبعت لأولاده (ولد وبنتين). عيّشهم في أحسن مستوى، علمهم في أحسن مدارس وجامعات، وجوزهم، وهداهم عربيات، وماخلاش نفسهم في صرصور عارفة.
الخيانة في "توكيل عام"
خلال آخر 16 سنة بس، الدكتور محمد حوّل لأولاده مبلغ يوصل لـ 50 مليون جنيه! وعشان هو واثق في ابنه الكبير، عمله "توكيل عام" عشان يخلص إجراءات رخص البنا والعقارات اللي بيشتريها بفلوس شقاه في مصر.
الصدمة اللي تكسر الضهر
لما كبر الدكتور وقرر يرجع بلده "عشان يرتاح وسط عياله" ويقضي بقية عمره في هدوء بعد ما وصل سن السبعين، كانت الصدمة اللي متمناش لعدو.. اكتشف إن ولاده "لهفوا" كل حاجة!
العقارات؟ اتسجلت بأساميهم.
العربيات؟ بقت ملكهم.
الفلوس؟ طارت في جيوبهم.
والأدهى من كدة، لما واجههم، كان ردهم فيه "فُجر" ملوش مثيل.. قالوله بالحرف: "كل حاجة متسجلة بأسامينا، ولو فكرت تنزل مصر هنحبسك!"
إحنا في " العجمي الإخبارية " بننشر القصة دي بمنتهى الأسى والحسرة .. إزاي ابن وبنت يهون عليهم أبوهم اللي عملهم و وصلهم للي هما فيه دلوقتي ؟ إزاي الجحود يوصل لدرجة التهديد بالسجن لابوهم الراجل اللي عنده 70 سنة؟
الفلوس بتروح وتيجي، بس البر مابينساهوش ربنا.. والظلم ظلمات يوم القيامة.
#العجمي_الإخبارية #حق_الدكتور_محمد_قاسم #جحود_الأبناء #مصر #الشرقية #قصص_واقعية