الدكتور يوسف بطرس غالي، وزير المالية الأسبق وخبير الاقتصاد الكبير، خرج وقال كلام مهم جدًا عن المقترحات اللي بتتكلم عن إن الحكومة ممكن تطرح سندات دولية بضمان قناة السويس وتجمع 100 مليار دولار عشان تسدد جزء كبير من الديون الخارجية دفعة واحدة.
غالي قال إن ده مش هينفع لان الفايدة اللي الدولة بتدفعها على الدين الخارجي حوالي 8 لـ 9 مليار دولار، وإيرادات قناة السويس حوالي 5 لـ 7 مليار بس، وممكن توصل لـ صفر لو حصل أي توتر في البحر الأحمر، وسأل "هتسددوا الدين إزاي؟ إحنا دلوقتي بنسدد من إيرادات القناة اللي بتروح للموازنة العامة".
وحذر من فكرة إننا نتنازل عن دخل القناة، لإن ده هيعمل فجوة كبيرة في الموازنة، والدولة بتصرف من الإيرادات دي على التعليم والصحة وخدمة الدين وقال: "مين هيديك 100 مليار دولار؟ الأصل اللي هتضمنه قناة السويس بيجيب حوالي 7 مليار سنوي، مش هيجمع 100 مليار".
كمان قال إن مفيش حلول سحرية أو عبقرية، وشبه الناس اللي بتستنى حل سحري بالمُسْتَخدم اللي داخل الامتحان من غير مذاكرة ومستني الوحي ينزل عليه! الحلول الاقتصادية موجودة وواضحة، لكن المهم تطبيقها بأقل ضرر ممكن على الناس البسيطة.
غالي رفض تمامًا فكرة إن الحكومة تتنازل عن أصول كبيرة مقابل تصفير الدين أو جزء منه، وقال إنه كلام مش منطقي ومش قابلة للتنفيذ، وكمان مبنية على فهم خاطئ للاقتصاد، السيولة والإصدار النقدي، واللي أي اقتصادي فاهمها كويس.
واتكلم عن قلقه لما بيظهر له فكرة جديدة محدش عملها قبل كده في العالم، وقال إنه طول عمره لما يشوف فكرة جديدة، بيبدأ يقلق، لإن غالبًا لو محدش عملها قبل كده يبقى يا الفكرة غلط أو هو مش فاهمها صح.
وأكد إن في حوالي 80 دولة نامية، 70% منهم بيعانوا من نفس مشكلة مصر (ديون داخلية وخارجية كبيرة)، ومفيش دولة واحدة خرجت بحاجة زي الفكرة دي.
غالي كمان شدد على نقطة مهمة جدًا أموال الحكومة اللي اتقرضت أصلاً أموال مودعين في البنوك، وسأل "هتدي المودع أسهم في شركة أو أصول بدل فلوسه لما يطلبها؟ مينفعش، فيه أخطاء في الفكر واضحة جدًا لمن يفهم الاقتصاد".
وعموما قال إن أي نقاش عن الديون لازم يكون على أساس الإيرادات الحقيقية للدولة في الموازنة العامة، ولازم نبص على حجم الإيرادات بالكامل قبل ما نحكم على عبء خدمة الدين.
ووضح إن الحلول الاقتصادية الصح هي اللي بتعمله الحكومة دلوقتي، زي رفع معدلات النمو الاقتصادي الحقيقي، زيادة الاستثمارات المحلية والأجنبية، السيطرة على التضخم وتحقيق استقرار الأسعار.
وشرح مثال بسيط عشان نفهم لو دخلك 500 جنيه ودينك 1000 جنيه، ده أزمة لكن لو دخلك زاد مليون جنيه، الدين اللي كان 1000 جنيه هيبقى مش مشكلة خالص يعني الحل الحقيقي مش التلاعب بالديون، الحل هو تكبير حجم الاقتصاد وزيادة الناتج المحلي.
كمان أشاد باللي بيعمله وزير المالية الحالي، وقال إنه مش بس بيعدل القوانين، لكن كمان بيغير طريقة التنفيذ والفكر عند الناس اللي بتطبق القوانين. وأكد إن تاريخيًا، العائق مش القوانين نفسها، لكن الناس اللي بتطبقها، وإن تغيير الفكر ده خطوة ذكية للإصلاح الحقيقي. عرض أقل