🔴 جنوب اليمن أعلنت رسميًا بدء خطوات انفصالها عن الشمال خلال السنتين الجايين... وده بيحصل بالتوازي مع مظاهرات ضخمة شغالة في معظم مدن إيران، ويبدو انها على وشك التحول لثورة ضد النظام الإيراني، وترامب بيقول ان أمريكا ممكن تتدخل فيها بشكل مباشر...
⚫️ الخبرين اللي فاتوا دول ممكن لو قرأت كل واحد لوحده تحس إن مالهمش علاقة ببعض... لكن لما تركز فيهم وتربط الأحداث ببعض، هتلاقي إن الأحداث اللي بتحصل دلوقتي دي هي تقريبًا كده الخطوة الأولى في الحرب الجاية بين إسرائيل وإيران... وبصمات الصهاينة واضحة جدًا فيهم...
🔸️ خلينا ناخدهم واحدة واحدة، عشان تفهم الرابط فين... 👇 (ملحوظة: انا هنا بنقلك الخبر نفسه واللي حصل على الأرض دلوقتي حسب كلام الإعلام، مش بتدخل في الموضوع ولا بقول رأيي غير في الصهاينة فقط)
1️⃣ أول حاجة حصلت من شوية كده، هي إن المجلس الانتقالي الجنوبي في اليمن، بقيادة "عيدروس الزبيدي"، أعلن رسميًا عن "بدء المسار الرسمي لاستعادة دولة جنوب اليمن"، وبالفعل المجلس حدد يوم 2 يناير 2028 كنهاية فعلية للوحدة بين الجنوب والشمال...
طيب ده معناه أيه؟
🟡 معناه يا صديقي (لو حصل فعلا) هو زلزال سياسي بكل المقاييس... لأول مرة من سنين طويلة، طرف محلي مسلح ومدعوم إقليميًا بيحط تاريخ نهائي وخارطة طريق مكتوبة للانفصال، وبيتعامل مع الموضوع كأمر واقع ونافذ مش مجرد مطلب تفاوضي...
وده جاي في اللحظة اللي السعودية والإمارات بيحاربوا بعض بالوكالة في اليمن، والسعودية بتحاول تحافظ على وحدة الدولة، بينما الإمارات بتدعم المجلس الانتقالي اللي عايز ينفصل...
🟢 الإعلان ده عشان تبقى فاهم، هو يعتبر بمثابة إعلان دولة، لكنه مؤجل التنفيذ... الزبيدي طالب المجتمع الدولي بإنه يرعى محادثات وحوار ما بين الجنوب والشمال، يوصل في الآخر لاستفتاء شعبي على حق تقرير المصير...
وتنفيذ الكلام ده مربوط بشروط خطيرة جدًا، أهمها إن الإنفصال ممكن يبقى نافذ فورًا لو الجنوب اتعرض لأي هجوم عسكري مستقبلي... وده اللي بالفعل بيحصل دلوقتي، من السعودية اللي بالفعل بقالها ساعات بتقصف مجاميع تابعة للمجلس الانتقالي بالطيران، وفي كلام انهم بالفعل طردوا كتير من قوات المجلس من مواقعهم..
🔵 يعني كده احنا عندنا موقف خطير جدًا، بيضرب شرعية مجلس القيادة الرئاسي اليمني اللي بيرأسه د. رشاد العليمي، واللي كان معمول في الأصل لدعم وحدة اليمن ومواجهة الحوثيين... دلوقتي الشرعية دي أصبحت مهددة..
والانفصال ده لو حصل ممكن يضرب مصالح مين تاني (غير السعودية)؟!
2️⃣ إيران طبعًا...
زي ما انت عارف، إيران يا صديقي ليها نفوذ كبير في اليمن عن طريق الحوثيين اللي قبل كده كانوا بيساعدوا إيران ضد اسرائيل عن طريق اعتراض السفن الإسرائيلية والأمريكية اللي بتعدي في البحر الأحمر، (وده طبعا ساعتها كان لضرب مصالح اسرائيل ودعما للمقاومة الفلسطينية أثناء حرب غزة)..
ودلوقتي لما يحصل كل ده في اليمن، فده معناه إن الحوثيين المدعومين من إيران مش هيبقى ليهم نفس النفوذ تاني... والسيطرة على ممرات الملاحة اللي هناك مش هتبقى تحت سيطرتهم خلاص... وهينافسهم فيها طرف تاني معادي...
🟣 وعشان تعرف إن كل اللي بيحصل ده مش صدفة، فبالتزامن مع ده كله وفي نفس اللحظة، إيران دلوقتي على صفيح ساخن حرفيًا، وبتعيش أسوأ لحظة داخلية ليها من عقود...
حسب مصادر من CNN والجزيرة، تجار "البازار" في طهران اللي هما يعتبروا عصب الاقتصاد التقليدي للبد، قفلوا محلاتهم وخرجوا في إضرابات واسعة فجأة وبدون سابق إنذار... وبعد خروجهم ده انضم ليهم طلاب الجامعات وبعدها باقي فئات الشعب بأعداد ضخمة جدًا، في مظاهرات ضخمة وممتدة من أول طهران ولحد محافظات تانية كتير زي محافظة لورستان ومحافظة تشهار محال وبختياري، وحتى مدن زي أصفهان وقم وكرمانشاه وشيراز وغيرهم...
🟠 طب ليه أصلًا، وأيه سبب المظاهرات؟!
السبب يا صديقي هو إن إيران كدولة بتعيش لحظة اختناق شاملة... اختناق اقتصادي واجتماعي وسياسي... واللي بيحصل في الشارع الإيراني دلوقتي ده نتيجة تراكم طويل جدًا من عوامل الضغط...
🟡 العملة الإيرانية خلال الفترة اللي فاتت وبسبب العقوبات انهارت انهيار شبه كامل، والدولار الواحد وصل سعره لحوالي 1.4 مليون ريال إيراني.. رقم خرافي ولا يستوعب بالنسبة للمواطن العادي، وخلى المرتبات اتحولت لأرقام مالهاش معنى... ده غير ان التضخم حسب البيانات الرسمية في 2025 وصل لـ 50%، والأسعار بتتغير كل كام ساعة، وحتى التجار نفسهم مبقوش عارفين يسعروا حاجاتهم، وعشان كده بيقفلوا محلاتهم التجارية دلوقتي، ونازلين مظاهراتهم ضد الحكومة...
وفي نفس الوقت، إيران بتعاني دلوقتي من أزمة مياه وكهربا حقيقية... عندهم جفاف صعب وكارثي مخلي السدود فاضية، وشبكات الكهرباء متهالكة، وانقطاعات بقت جزء من الحياة اليومية، لدرجة ان الجفاف بلغ مرحلة إن إيران بتخطط لنقل عاصمتها من طهران خالص، عشان مبقاش في مية بتوصل للشعب، والناس معتمدين على زجاجات المياه المعلبة!
🟢 أمام كل ده، الحكومة الإيرانية حاولت ترضي الشعب، وخدت قرارات كتير بس الناس مازالت مستمرة وفي غضب شعبي كبير، والغضب ده (بنسبة 100%) بيتم تأجيجه وإشعاله أكتر من خلايا الموساد الموجودة في الداخل الإيراني عشان يتم استغلاله لإسقاط الدولة... ونتنياهو نفسه من كام شهر كان طالع بيدعو الشعب الإيراني رسميًا للتظاهر ضد النظام، وبيقول إن إسرائيل هتدعمهم!
لحد دلوقتي في 6 متظاهرين اتقتلوا برصاص حي من قوات الشرطة، والجديد في الموضوع إن في واحد اتقتل كمان من قوات الأمن (الباسيج) في مدينة كوهدشت... يعني الموضوع خرج من مجرد شرطة بتضرب نار ع المتظاهرين، ودخل في إن المتظاهرين نفسهم بيهاجموا قوات الأمن!
🔵 ومع تصاعد المظاهرات، وتحولها لهتافات هدفها إسقاط النظام نفسه، الحكومة قررت إغلاق المدارس والجامعات والمكاتب العامة، والدنيا هناك والعة..
وفي وسط كل ده بقى، مين يتدخل؟!
3️⃣ ترامب...
من شوية على منصة تروث سوشيال، الرئيس الأمريكي دونالد ترامب كتب تغريدة قلبت الدنيا أكتر، لما قال: "إذا أطلقت إيران النار على المتظاهرين السلميين وقتلتهم بعنف، فإن الولايات المتحدة ستأتي لإنقاذهم.. نحن جاهزون ومستعدون تمامًا للتحرك"...
🟣 التصريح دا قلب الدنيا في طهران، والخارجية الإيرانية اعتبرته تدخل سافر وخطير وإن أمريكا بتحاول استغلال الموقف لنشر الفوضى في إيران، و"علي شمخاني" مستشار المرشد الإيراني رد عليه وقال إن أمن إيران خط أحمر، وإن "كل يد تتدخل أو تقترب من أمن إيران ستقطع قبل أن تصل وبرد رادع ومكلف"!
🔸️ وكل ده بيحصل امتى؟!
بعد ساعات قليلة من زيارة نتنياهو لترامب في أمريكا، ومناقشاتهم مع بعض عن إيران واللي أعطى فيها ترامب لنتنياهو الضوء الأخضر ضمنيًا لمهاجمة إيران بسبب استمرارها في زيادة تسليحها الصاروخي!
🟡 الأحداث اللي بتحصل دلوقتي دي يا صديقي كلها مرتبطة ببعض ومش متفرقة خالص، مهما بانت لك في البداية متفرقة... كل خطوة بتحصل في العالم دلوقتي هي نقلة جديدة على رقعة الشطرنج بتلعبها اسرائيل وأمريكا وحلفاءهم في المنطقة العربية، وهدفها هو تفتيت الدول العربية والإسلامية لتحقيق أهدافهم التوسعية على حساب الشعوب...
ولو العرب مفاقوش وتخلصوا من صراعاتهم الداخلية واتحدوا على قلب رجل واحد قبل فوات الأوان، فـ غالبًا كده 2026 هتكون سنة هنندم فيها على حاجات كتير...
🔴 هسيبلك المصادر والتقارير اللي اعتمدت عليها تحت في الكومنتات كالعادة 👇 ولو وصلت لهنا متنساش الشير عشان غيرك يعرف بتفاصيل اللي حاصل دلوقتي..